ÕDAGUMERESOOMÕ PIIRIQ

Võro Instituudi süküskonvõrentsel om olnu teemas õdagumeresoomõ kiili lõunapiir ja hummogupiir, tan om kõnõld õdagumeresoomõ veeremaiõst ja tõsõlt puult (vahtsõndus)keskuisist õdagumeresoomõ piire pääl.

Timahavadsõ, viiõtõistkümnendä konvõrendsi teemas ommaq õdagumeresoomõ piiriq ületsehe ja kokkovõtvalt. Mõtõldu om piire nii maatiidüse ku ka müüdelännü ao plaanin, niisamatõ piire ku piiritõmbamist. Määne kotus uurali kiili jakkuvusõn om õdagumeresoomõ kiilil? Määndseq keelelidseq ja kultuurilidsõq tegijäq ommaq kujundanuq õdagumeresoomõ kiili maa-alla eri aigõl? Midä kõnõlasõq vanaq balti, germaani ja slaavi lainsõnaq kunagidsõ keelelidse kokkoputmisõ loomussõst ja võimalusõst tuuaolidsi hõimupiirõ kaardi pääl är näüdädäq?

Noidõ piire kõrval, miä ommaq nätäq kiili vaihõl ja kiili seen, om olõman viil mitmasugumaidsi piirõ ainõlidsõn ja suulidsõn kultuurin. Seossõn õdagumeresoomõga oodami piire kottalõ ettekandit nii rahvaluulõ ku rahvakultuuri uurjilt. Konvõrendsi külälisi ommaq kõgõ huvitanu vana ao välläkaibmisõq. Midä vahtsõt ommaq arheoloogiq lõunaeestäisi ainõlidsõst ja ütiskundlidsõst minevigust teedäq saanu edimädsest Võro instituudi konvõrentsist müüde lännü 15 aastaga joosul?

Lisas nii vai tõistõ keele ja aoluuga köüdetüile ettekandilõ ooodami ettekandit kotussõnimmist, kon nimekotus om märknü piiri vai nimen om pruugit piiri tähendüsega sõnna.

Kõrraldajaq: Võro Instituut ja Tarto Ülikooli keeletiidüse, filosoofia ja semiootiga doktorikuul.

Konverendsi tüükeeleq ommaq õdagumeresoomõ keeleq ja inglüse kiil. Ettekandidõ ümbrepandmist ei olõq.

Kirjäpandminõ ja muu konvõrendsiteedüs

Ku märgit konvõrendsilõ tullaq, pallõmi är täütäq registreerumisleht aadrõssi http://www.wi.ee/index.php/konvorents pääl ja saata tuu kõgõ ildampa 15. hainakuu pääväs 2011 Võro Instituuti (e-post See e-posti aadress on kaitstud spämmirobotide vastu. E-posti aadressi nägemiseks peab olema JavaSkripti kasutamine olema lubatud. , faks +372 7821315, postiaadrõss Tarto huulits 48, 65609 Võro liin).

Ettekandidõ pikkus om 20 minotit. Oodami ka sainaettekandit. Artiklis toimõndõduq ettekandõq retsenseeritäseq ja andasõq vällä Võro Instituudi Toimõnduisi 2012. aastaga numbrin. Ku tahati ettekannõt pitäq, pallõmi üten kirjapandmisõga saataq uma jutu kokkovõtõq (kooni 200 sõnna) üten konvõrendsi tüükeelen.

Terve konvõrendsi osavõtumass om teno tävvändäväle toetusõlõ õnnõ 25 eurot. Tuu seen ommaq üümaja, söögikõrraq, kohvivaihõq, Karula kihlkunna ni piiriliina Valga näütämine ja noilõ, kinkal vaia, buss Talliina sadamast konvõrendsipaika ja tagasi (ka Tarton om piätüs). Keeletiidüse, filosoofia ja semiootiga doktorikooli tudõngidõ käest osavõtumassu ei tahetaq.

Kirjäpandnuilt oodami osavõtumassu kõgõ ildamba 15. süküskuu pääväs (15.09.2011) konto pääle 10220034796011 (SEB), massu saajas pandaq rahandusministeerium, lättenumbrõs 11001700043478 ja seletüste Võro Instituudi konvõrents (SWIFT: EEUHEE2X, IBAN: EE891010220034796011). Massa saa õnnõ pangaülekandõga. Kiä taht arvõt, tuul tulõ tuud kõrraldajidõ käest küssüq.

Konvõrendsi järgmäne teedüskiri üten kavaga saadõtas kirjäpandnuilõ lakja süküskuun.

Küsümiisile vastasõq: Evar Saar vai Triin Laatre, Võro Instituut, Tarto huulits 48, 65609, Võro liin, e-post See e-posti aadress on kaitstud spämmirobotide vastu. E-posti aadressi nägemiseks peab olema JavaSkripti kasutamine olema lubatud. , mob +372 56213174, tel +372 7821960