Looming

Petserimaa külad. I (Hilanamoro 2005)

Pesad : väikesed jutud  (Võru 2005)

Petserimaa külad. II (Hilanamoro 2006)

Petserimaa külad. III (Hilanamoro, 2007)

Sain haarata hetki : Setomaa hetki aastaist 1994-2007 (Hilanamoro 2008)

Vii üle vii. Armastusluulõkogomik (Hilanamoro 2008)

MA OLÕ VIHM

ma olõ vihm
sünnütarõ lastukatusõl
ja vana vanni põh´aplekil
lauda takah nõgõsih
ja pedäjänõklo küleh mõtsah
ja hobõsõ nal´akide kõrvu karvuh
ma olõ vihm
Üte vana naasõ põsil
sääl Setomaal kar´aaia takah
ja pinihaugahtusõh inne üüd
ma olõ vihm
pääle pikkä põuda
sääl Oravast Meremäeni
olõ ütskõrd vihm
sääne rahulik ja tiba
nigu kar´apoisi uni
värskide haino pääl
ja sääl ma mõista häste
om vaja kasvai ütel pääväl
ollaq vihm
põvvatsõ sünnümaa kotsil



LÖÖVÄ` KELLÄ`

Kellä` löövä` ja tinises taivaviir.
Taivaviir taa, vai su su süämekild?
Süämekild, naidõ küläkeiste küleh kinni,
mis okastraadi takah häöse
ku kulladsõ` kõolehe` muah…
Löövä` kellä` ja süküs lätt talvõs,
peesütä-i ilmarahvas su murõht -
nii õks kadonu vanaimä ütel.
Omma` talvidsõlt kalgi` naa maailma mõttõ` -
muudku uikva takah rahha ja võimu.
Uikva tuud, mis nii kergehe kaos!..
Ullilt jätetäs maa ja sö puul-uma Seto…
nigu olõsi-i meid olõmbah inämp
täämbä ja hummõn. Mälestüs ütsündä jääs.
Tuud vast löövä nä kellä`…
Kellä` löövä` ja tinises taivaviir.
Kellele, kellele löövä` nä kellä`?
Olõ-i midägi tetä, ku kõrva` kluhho`,
kuulõ-i egaüts kumõhit kelli…
Kes tuu tiidki, õt KELLÄ` LÖÖVÄ`?!