Viimädse paari aastakümnegaq om võro kiil' tiatrin väega popis saanuq. Tiatritegejide tsyyr' om lagja: külä näüteringiq, koolilatsõq, täüskasunuq liinan, puul'kutsõlisõst projektitiatrist kutsõlisõ tiatriniq vällä. Tiatrikunst' om üts' viimätside aastidõ joosul inämbarõnuq võrokeeline kultuurivaldkund.

Üle Eesti kuulsas sai joba 1993. aastal Eesti Muusigaakadeemiä Korõmban lavakunstikoolin lava pääle säet näütemäng "Põud ja vihm Põlva kihelkonnan nelätõistkümnendämä aasta suvõl". Edimäne näütämine oll' 3. jõulukuu pääväl 1993, lavastajas Ingo Normet, kirotajis Madis Kõiv ja Aivo Lõhmus.

Võrokeelidse tiatri hällüs või pitäq Kaika suvõülikuulõ, kon om ette kannõt mitmit sääntsiid tükke, miä ommaq ildamb saanuq kutsõlisõgiq tiatri repertuaari osas.

1998. aastagal kuulut' Võro instituut' vällä võrokeelitside näütemängõ konkursi, mink iinmärgis oll' vahtsidõ näütemängõ saaminõ. Projekti iistvõtjas oll' Marju Kõivupuu, rahalidsõs tugõjas AS Hansatee Grupp. Võistlusõlõ saadõti kats'tõiskümend tüüd. Edimäst kotust vällä es andaq, a annõti kats' tõist (Kauksi Ülle "Tandsja pühälik" ja "Kalmuneiu") ja kolmas kotus (Voldemar Raidaru "Ku maa palli"). 1999. aastagal kuulut' Võro Selts' VKKF vällä tõsõ näütemängõvõistlusõ, mink võitjaq kuulutõdiq vällä Mehikuurma suvõülikoolin. Edimädse kotussõ sai Arthur Heinlo latsinäütemäng "Konstaabli Pitsu". Preemiäq saivaq ka Voldemar Raidaru "Tarvassaare rahvas" ja Ants Kõivu "4 vai 5". Tunnustõdi ka tõisi kirotajit.

Täämbädse päävä kõgõ jõvvulidsõmb võro keelen tiatri tegejä om puulkutsõlinõ Võro Tiatriateljee, miä tege ummi tegemiisi Võro Kultuurimaja Kannõl all ja om innembidse Võro Harrastustiatri perrätulõja. 1999. aastagast pääle toimõndas tä välläsäädjä Tubina Taago iistvidämisel uma programmi perrä, mink tagapõh'as om uma kiil ja kultuur. Tuujaos tarvitõdas väärtkirändüst ja -näütemängõ. 1999-2005 om lava pääle tuud mitu võrokeelist tükkü. Kolm lavastust om saanuq Grand Prix' üleriigilidsel harrastustiatridõ festivaalil.

• Jaan Lattik/Madis Kõiv/Taago Tubin "Ütskõrdüts" - edimäne näütämine 20. joulukuul 1998 Võrol Kreutzwaldi muusõumin;
• Andrus Kivirähk/Taago Tubin "Rehepapp" - edimäne näütämine 7. hainakuul 2001 Vahtsõn Roosan, Mõtsavele Talo saeveskin;
• Madis Kõiv/Taago Tubin "Ennola" - edimäne näütämine 28. rehekuul 2003 Kandlõ kultuurimaja tiatrisaalin.

Võrokeeline "Rehepapp" oll' Eesti iist välän ka Põh'amaiõ harrastustiatrifestivaalil Arosia 2002 Roodsin. Lavastus "Ennola" sai ETV kultuurisaatõ "OP" aasta lavastusõ tiitli 2003 ja 2004 tull' vällä näütemängu kuuldõmänguversioon Eesti Raadio raadiotiatrilõ. Võro keelen om mängit viil Juhan Jaigi/Kalev Kudu "Pito pahandusõga" (1999), Olavi Ruitlasõ/Tarmo Tagametsa "Vollit" (2004) ja Juhan Jaigi/Jan Rahmani "Painajat" (2006).

Võro keelen om lava pääle säet ka maailmanäütemängõ: Pentti Saarikoski "Kaurin pelto" (2000), käsitüüliisi luku William Shakespeare'i näütemängust "Midsummernight's Dream" (2005), Arthur Milleri "The Creation of the World and other Business" (2006).

Tiatriateljeed tugõ Võro liin ja aastast 2007 ka EV Kultuuriministeerium.

Kutsõlisõn tiatrin om lõunaeestikeelitsit lavastuisi tennüq päämädselt Ain Mäeots Vanemuisõn.
Vanemuisõn om kavan olnuq kolm lavastust:

• Bernard Kangro "Susi" - edimäne näütämine 5. märdikuu pääväl 1995 Vanemuisõ E-lava pääl;
• Madis Kõivu "Elli" - Edimäne näütämine 19. joulukuu pääävl detsembril 1998 Vanemuisõ suurõn majan;
• Kauksi Ülle/Sven Kivisildnigu "Pühak" - edimäne näütämine 8. süküskuu pääväl 2001 Vanemuisõ väikun majan;
• Kauksi Ülle "Taarka" - edimäne näütämine 4. põimukuu pääväl 2005 Obinitsan.

Suurõn osan võrokeelitse tükü tõi 2005. aastagal lava pääle ka Theatrum, kon tull' vällä rühmägaq tett lavakava Võromaa lukõst ja laulõst "Pido pahandusõga". Tuu edimäne näütämine oll' 12. piimäkuu pääväl Theatrumi saalin.

Mitu suvvõ järgepiten om tett ka mitmin Võromaa kotussin võrokeelitsit suvõlavastuisi. Näütüses ommaq Räpinä, Palamuse ja Võro harrastusnäütlejäq üten Räpinä Näütlejide seltsingugaq mitmal suvõl toonuq rahva ette Aapo Ilvesse ja Raivo Adlassõ Räpinä-triloogia:

• "Ööpik Wõhandu kaldalt" - edimäne näütämine 13. hainakuu pääväl 2002 Räpinäl;
• "Wõõbsu palas!" - edimäne näütämine 11. hainakuu pääväl 2003 Võõpsun pritsikuuri platsi pääl;
• "Sillapää Ossi kronika" - edimäne näütämine 14. hainakuu pääväl 2004 Räpinäl.

Näütemängoseldsi Vilde Teater harrastusnäütlejidega om Raivo Adlas lava pääle toonuq Aapo Ilvese suvõetendüse "Sanna takah tiigi man" (edimäne näütämine 8. hainakuu pääväl 2005 Tarton Tiigi seldsimajan).

Mitu aastat om Puiga koolil tavas olnuq kõrraldaq võrokeelitside näütemängõ päivi Võromaa kuulõ näüteringe jaos. Puigalõ tulõ ummi võrokeelitsit tükke näütämä umbõs kümme kuuli egä aastak. Pia kyik' kõrraq ommaq platsin olnuq Haani, Ruusmäe, Kuldri, Kääpä, Mõnistõ, Puiga, Orava, Parksepä ja Võro Kreutzwaldi kooli latsõq. Üts' edimäidsi võro keelen mängjit oll' Kuldri koolitiatri Zoja Mellovi iistvidämisel.

Ka Võromaa külätiatriq ommaq nakanuq inämb mäng'mä võro keelen (Rõugõ rahvatiatri, Loosi Nalanaase', Hurda külätiatri jt).

Tal'na Võro seldsi näütering' "Hüdsi" om lava pääle toonuq joba mitu võrokeelist näütemängu: Ants Kõivu "Viiekõistõ rüänurmõn", "Mõtsavele sõsar", "Puss" jt.