Päält keeleuurmiisi om Võro Instituut kõrraldanuq (keele)sotsioloogiliidsi uurmiisi Setomaal (1997. aastagal), Lõunõhummogueesti kolmõn maakunnan (1998), Saarõ maakunnan (2001) ja aoluulidsõl Mulgimaal (2002). Uurmiisi ütes päämidses tsihis om olnu paigapäälitside kiili parhillatsõ saisu kimmästegemine. Keele tarvitamisõ säädüsperri selgestegemises om kogut ja analüüsit aoluuliidsin kultuuripiirkundõn elävide suuri inemiisi (murdõ)keele pruukmist ja mõistmist näütävit empiiriliidsi andmit. Tuujaos om küsüt inemiisi hinnangit paigapäälidse keele tarvitamisõ ja tuu tarvitamisõs pasvidõ kotussidõ, teemadõ ja valdkundi kotsilõ. Nimmat hoiakit om analüüsit eri sotsiaaldemograafiliidsi näütäjide lõikõn. Pääle tuu om esi uurmiisin näüdät ka hindätiidmist, kombit, periolõmist, põlisust ja eloviit pututavat ja pall'ond muudkiq.

Kõigi naidõ uurmiisi tulõmidõ perrä või üldä, et paigapäälidse keele tarvitamisõ säädüsperäsüseq ommaq rohkõmb vai veidemb köüdedüq suu, vannusõ ja haridusõgaq. Paikligun keelen kynõlõsõq sakõmbalõ meheq, vanõmbaq ja veidemb koolin käünüq inemiseq. Lisas toolõ paistus, et viimätsel aol om keelest inämb pidämä naat. Saman om muutuisi sõski võimalik uuri õnnõ pikembä ao joosul. Muutusõq suhtumisõn kiilde ei piäq kimmähe tähendämä keele mõistmisõ paranõmist, keele mõistmist om vaia eräle kontrolli.