19. joulukuu pääväl valisi’ Võro Instituudi tüütäjä’ ja keelepesäoppaja’ Vodi Egle ja Rõõmusoksa Triin vällä käsitüütsirgu, kiä/miä nakkas „elämä“ võrokiilsen latsiaiarühmän. Konkursist ossa võtma tuudi viis tsirku. Võidutsirgu meisterdäjä om Pakleri Sirje.

Pakleri Sirje tett tsirk om piaaigu täpsäle sääne, nigu konkursi välläkuulutaja’ olli’ inne mõtõlnu. Tsirku om hää keeleopmisõ man tarvita’ niimuudu, et latsõ’ andva’ tedä käest kätte ja kõnõlõsõ’ tsirgu iist. Sirje om tsirgu ummõlnu linatsõst, tarvitanu tuu man ka rahvarõivaundrugu rõivast ja paklast hiusit. Hindajidõ meelest om hää mõtõh tuu, et tsirku saa kübäräga tetä’ mehes ja rätiga naasõs. Tsirk om üteliisi nii keelepesärühmä maskott ku ka tuu, kink abiga latsõ’ võro kiilt opisõ’.

Ülejäänü’ neli tsirku olli’ ka kõik süämega tettü’ ja tävveste esi’ näkku. Egä käsitüütegijä oll´ valinu tsirgu tegemises eri tehniga ja eri matõrjaali.

Roosma Anu tõi konkursilõ savist valõdu väega vana ja targa näoga tsirgu. Tuu tsirk om kõgõ inämb keelepesä logo pääl olõva tsirgu muudu. Hindajil tull´ mõtõh seod tsirku edespiten pruuki’ hää võro keele oppaja tunnustamisõs.

Väega varajanõ tsirk tuudi hindamisõs õkva pääle konkursi välläkuulutamist. Taa omma’ tennü Parksepä 1. b klassi latsõ’ üten oppaja Käre Enega. Kihä om täl tett puuhalust ja muiõ kihäossõ jaos om tarvitõt puulehti, sammõld, upõ ja kõrkjat. Seod ideed om hää ka tõisil latsil perrä tetä’.

Kõgõ kavvõmast linnas´ meile konkursilõ tsirk Ameerigamaalt. Tuu om hambatikkõst ja värviliidsist aokiräjupikõisist kokko liimnü Worthi Katre. Instituudi rahva siän sai seo tsirk kittä’ uutmalda disaini iist ja tiinse hindäle hõikusnime „tikumaja“.

Viimäne võistlõma tuud tsirk om Allasõ Diana meisterdet paklanöörist. Seod tsirku saa kohegi üles riputa’ ja timä külen olõva kotikõsõ sisse käkki’ kompvekke vai mõnõ vähäligu mängu. Lihtsä ja taipsa mõtõh!

Kõik konkursist osavõtja’ saava’ hindäle tenos valli’ Võro Instituudi välläandit. Konkursi võitja Pakleri Sirje saa avvuhinnaraha iist tetä’ viil ütessä tsirku. Avvuhinnaraha om Võro Instituut küsünü Eesti Kultuurkapitalilt.