Võro keele ja kultuuri tundmisõ võistlusõ 8. klassi arvõstusõn oll' kõgõ parõmb Kristel Sibul Vilustõ põhikoolist. Hää’ võro keele tundja’ omma’ viil Madis Perli (Haani kuul), Karl Edgar Raudsep (Võro Kreutzwaldi gümnaasium, VKG), Laura Eiche (VKG), Lisann Mikson (Võro Keskliina gümnaasium, VKLG), Karl-Martin Viiberg (VKG), Hanna-Liisbeth Lumi (Vahtsõliina gümnaasium, VLG), Laura Tammemägi (VKG), Maarja Ots (Antsla gümnaasium), Anna-Liisa Mander (VKG), Lauri Kond (Mõnistõ kuul).

Kõgõ rohkõmb osavõtjit oll' Võro Kreutzwaldi gümnaasiumist, Antsla gümnaasiumist, Rõugõ ja Osola põhikoolist.

11. klassi arvõstusõn sai kõgõ inämb punktõ Sander Erik, kiä opis Vahtsõliina gümnaasiumin. Hää’ keeletundja’ omma viil Kadri Reiljan (Varstu keskkuul, VK), Anneli Palopson (Verska gümnaasium), Risto Kööts (VKG), Kerly Kerge (VKLG), Peeter Parts (VK), Lauri Kasak (VKG), Merlin Hurt (VKG), Liisa Kunnus (VKG), Egle Toom (VKLG), Getheliis Tambets (VLG).

Kõgõ rohkõmb osavõtjit oll' Antsla gümnaasiumist, Võro Keskliina ja Vahtsõliina gümnaasiumist.

25 kõgõ parõmbat nii 8. ku 11. klassi arvõstusõn kutsutas võro keele olümpiaadilõ, miä tulõ vahtsõ aasta radokuu 16. pääväl Võro Keskliina gümnaasiumin.

Kokko võtsõ veebivõistlusõst „Ütski tark ei sata’ taivast” ossa 175 8. klassi ja  78 11. klassi nuurt. Hindä proovilõpandjit oll' 14 koolist. Mineva aasta oll' osavõtjit 8. klassist 323 ja 11. klassist 97, kokko 24 koolist.

Võro keele ja kultuuri tunni’ omma’ parhilla aoluulidsõ Võromaa 22 koolin. Võistlust „Ütski tark ei sata’ taivast” kõrraldas Võro instituut 2001. aastast pääle.