15. septembril kell 15 om Võro instituudin ”Mino Võromaa” 24. jutuvõigõlusõ parõmbist töiest kokko pantu latsiraamadu ”Häiermit ja pisarit” vällänäütämine. Säälsaman andasõ' teedä' ka kirätöie konkursi võitja'.

Timahava võtsõ latsi ja nuuri võrokeelitside kirätöie võigõlusõst ossa 143 kirotajat 146 tüüga. Hindajidõ kogo (Hollo Aimi, Laanpere Helle, Fastrõ Mariko, Ojari Triinu, Allasõ Tiia ja Saarniidu Hardi) valõ naidõ hulgast kogomikku 64 tüüd. Seokõrd tahi' noorõ' kõgõ inämb kirota' kalalkäümisest, niisamatõ saadõti võigõlusõlõ hulga sanna-, eläjä- ja puutrijuttõ. Pääle juttõ ja värsse tull´ timahava konkursilõ õigõ mito näütemängo.

 Raamatulõ ”Häiermit ja pisarit” om pildi' tsehkendänü Võromaa juuriga kunstnik Viina Kristina.

Latsi ja nuuri võrokeelitside kirätöie võigõlust alost´ 1987. aastagal Võro hariduskuundis. Võigõlusõ mõtõ om opada' nuuri hoitma uma kandi kiilt ja kombit, kodokotust. 2000. aastagast pääle kõrraldas võigõlust Võro instituut.