28. jaanuaril peeti võro keele ja kultuuri olümpiaat “Ütski tark ei sata
taivast”, kon 8. ja 11. klassi opilaisi siäst paistsõ hää keeletunnõtusõga
silmä setu noorõ.

2009. aasta novvembrin oll´ võro keele nädälil võistlus “Ütski tark ei sata
taivast IX”, mille egä kooli parõmba saiva kutsõ võro keele ja kultuuri
olümpiaadilõ. Võistlusõst võtt´ ossa üle 300 noorõ 23 koolist. Päält vana
Võromaa kuulõ oll´ osavõtjit ka Setomaalt ja Ahja koolist.

28. vahtsõaastakuu pääväl oll´ Võro Kreutzwaldi Gümnaasiumin võistlusõ
lõppvuur – võro keele ja kultuuri tundmisõ olümpiaat, minkast võtt´ ossa 29
8. klassi opilast. Seo vannusõrühmä edimädse kotussõ võitsõva setu peritollu
noorõ. 11. klassi arvõstusõn murdsõ pääd 18 nuurt ni siingi jõudsõva seto noorõ
kõgõ parõmbide sekkä.

Võro keele ja kultuuri tundmisõ olümpiaadi kõgõ parõmba:

8. klass
I koht – Ruti Kirikmäe (Verska Gümnaasium)
II koht – Laura Kruusamäe (Verska Gümnaasium)
III koht – Semmo Hõrn (Vahtsõliina Gümnaasium)

Eriavvuhinna hää võro keele hoitmisõ, arõndamisõ ja edesiviimise iist saiva:
Ardi Kaaristo (Pikäkannu Põhikuul), Carmen Kuningas (Puiga Põhikuul), Valev
Laube (Varstu Keskkuul), Pirgit Toots (Krabi Põhikuul).

11. klass
I koht – Henn-Hillar Kalkun (Võro Keskliina Gümnaasium)
II koht – Birgit Pettai (Võro Keskliina Gümnaasium)
III-IV koht – Keidy Lillmaa (Võro Kreutzwaldi Gümnaasium), Evelin Ämarik
(Verska Gümnaasium)

Eriavvuhinna hää võro keele hoitmiso, arendamis ja edesiviimise idee iist
saiva:
Anti Jaas (Friedebert Tuglase nimeline Ahja Keskkool), Kersti Kaupo
(Vahtsõliina Gümnaasium).

Noorõ löüdse, et võissi olla inämb võimaluisi võro keelen kõnõlda ni võro
kiilt pruuki. Märgiti, et egän klassin võinu olla kohustusligu kirändüse
nimekirän ka üts võrokiilne raamat ni mõni tunn võissi koolin olla uman
keelen. Puudust tundas võrokiilsist telesaatist ja hääst filmist. Kohaligõ
aolehti väiku jaokõnõ võinu olla umakiilne, sääl saanu sõnna näites põnõvidõ
ni andsakite juttõ kirotaja, nigu Ruitlanõ Uman Lehen.


Olümpiaadi ja võigõlusõ kokkovõtminõ


Teedüs:

Tiia Allas,
Võro Instituudi keele ja kirändüse asjatundja

Tel. 78 2875