Inne 1989. aastagat pruugiti võro kiilt aokirändüsen küländ veidü. Paiklikku kiilt tarvitõdi aig-ailt maakunna lehtin. Võrokeelist õkvakõnnõt tarvitõdi stiili parõmbas tegemises, oll' ka nal'ajutukõisi ja värsikeisi. Tihtipääle kehvä keeletarvitusõ päätsihis oll' innekõnnõ nal'ategemine.

1990-ndil aastil läts' võro ja seto keele tarvitus aokirändüsen suurõmbas. Innekõkkõ oll' nätäq uma keele suurõmbat tarvitamist paikligõn raadioten. 1991-1993 olliq Võru raadio pall'oq saatõq võrokeelitseq. Seto kiilt tarvitõdi 1990-ndi lõpul Kaguraadio saatõn Setomaa tunn. Trüküaokirändüsen ilmu paras hulk võrokeelitsit teedäqandmiisi ja märgotuisi 1990. aastide algusõ aolehin Võru Teataja ning Lõunakaar. Ildampa om löüdäq setokeelitsit artikliid 1995. aastagal ilmuma nakanu aolehen Setomaa.

2000 aastagal pääle naanu riiklinõ programm „Lõunaeesti keel ja kultuur“ sääd' umas tsihis tukõq innekõkkõ võrokeelist trüküaokirändüst, raadiot ja televisiooni ja internetiaokirändüst.

Programmi toega nakas 2000 aastagal ilmuma otsastlõpuni võrokeeline kuuleht Uma Leht, miä 2004. aastagast tulõ vällä egä katõ nädäli takast. Umma Lehte saa lukõq ka Internetist.

Trükün om ilmunu ka aolehe Sirp Lõunõ-Eesti teemanummõr (9. august 2002) ja aokirä Vikerkaar võro-seto erinummõr (nr 7/8, juuli-august 2005). Egä kuu tulõ ka aoleht Setomaa, kon om egän numbrõn õks setokeeline lugu kah. Novvembrin 2005 ilmu aokirä „Teater. Muusika. Kino“ Lõunõ-Eesti teemanummõr (nr 11/ 2005).

Latsilõ om tettü aokirä "Täheke" viis võrokeelist nummõrt (veebruaar ja novvembri 2005, mai 2006, detsembri 2007, septembri 2008).

Tele- ja raadiosaatõq. Riiklidsõ programmi toega om 2000 aastagast pääle tettü mitmit raadio ja telesaatit, päämidsõlt ETV-n ja Eesti Raadion. ETV-n om näidatü telesarju:

• Kaemi perrä (6 saadõt ETV-n jaanuaar–veebruaar 2001)
• Kihoq (6 saadõt ETV-s juuli–august 2002)
• Serva pääl (10 saadõt ETV-n 2002)
• Veere pääl (5 saadõt ETV-n detsembri 2002–märts 2003)
• Mõtõlus (23 saadõt ETV-n jaanuaar 2004–märts 2005)
• Piiri pääl (5 saadõt ETV-n märts–mai 2005)
• Elolinõ (5 saadõt ETV-n novvembri–detsembri 2005)
• Tsirk, tsirk, tsirgukõnõ (6 saadõt ETV-n märts-aprill 2006)
• Elolinõ 2 (11 saadõt ETV-n veebruar-aprill 2007)

Eesti Raadio Vikerraadio programmin sai kullõlda sarju "Lõuna-Eesti kohavaim" (10 saadõt aastagal 2002), "Inemise sisu" (6 saadõt aastagal 2002) ja "Ütsik täht" (7 saadõt 2003–2004; 5 saadõt detsembri 2005 - aprill 2006), niisamate tetti 3 võrokeelist "Raadio Ööülikooli" (2004). 2006 aastaga keväjä ja sügüse oll Klassikaraadio eetrin 16 saadõt Lõuna-Eesti perimusõst. Päält saatõsarju om raadion olnu ka võrokeelitsit uudissit, 2003 ja 2004 and' programm rahha võrokeelitside uudisside tegemises paikligõn raadiojaamun Raadio Ring ja Marta FM. 2005 aasta sügüsest om egä katõ nädäli takast Vikerraadion võrokeeline uudisidõsaadõq Uudissit Võromaalt.